काठमाडौं । बडादशैंको समय दुर्गा भवानीका विभिन्न अवतारको पूजा आराधना गरिन्छ । देशभरका विभिन्न शक्तिपीठमा महाकाली, महालक्ष्मी, महासरस्वती, अम्बिका, उमा, दुर्गालगायत विभिन्न स्वरूपमा नवदुर्गाको पूजा गर्न घटस्थापनादेखि नै भक्तजनको भीड लाग्ने गर्छ ।
काठमाडौंका शोभा भगवती, दक्षिणकाली र भद्रकाली, गोरखाको मनकामना, काभ्रेको पलाञ्चोक भगवती लगायत मठमन्दिरमा घटस्थापनादेखि नै देवीदर्शन र पूजाअर्चनाका लागि भक्तजनको भीड लाग्ने गर्छ । यसबाहेक देशका विभिन्न शक्तिपीठहरूमा भक्तजनले आस्थाका साथ पूजाअर्चना गर्ने गरेका छन् ।
देशभरका प्रमुख १५ शक्तिपीठहरूः
१. पलाञ्चोक भगवती
पलाञ्चोक भगवतीको मन्दिर काभ्रे जिल्लाको साठीघर भगवती गाविसमा अवस्थित छ । दशैंमा विशेष मेला लाग्ने यस मन्दिरमा घटस्थापनाका दिनदेखि कोजाग्रत पूर्णिमाका दिन सम्म नै भक्तजनहरूको भिड लाग्ने गर्छ ।
२. माईपोखरी
इलामको उत्तरी क्षेत्रमा अवस्थित माईपोखरी र नवरात्रको नजिकको सम्बन्ध छ । नवरात्रमा नौकुने पोखरीका नौवटै कुनामा दुर्गाको नौ स्वरूपका रूपमा पूजा गरिन्छ । हरेक वर्ष असोज शुक्ल प्रतिपदादेखि नवमीसम्म माईपोखरीमा मण्डप बनाई ब्राह्मणहरूद्वारा सप्तशती पाठ गरिन्छ ।
३. छिन्नमस्ता (सखडा)
सप्तरी जिल्लाको राजविराजबाट १२ किलोमिटर दक्षिणमा रहेको छिन्नमस्ता (सखडा) भगवती मनोकामना पुरा गर्ने शक्तिपीठका रुपमा चर्चित छ । नेपाल, भारत र बंगलादेशका हिन्दुको समेत आस्थाको केन्द्र सखडामा, दशैंंका बेला हजारौ संख्यामा पशु बलि दिइन्छ ।
४. मनकामना मन्दिर
मनकामना मन्दिर, गोरखा जिल्लाको सदरमुकामबाट दक्षिणपूर्वी भागमा अवस्थित छ । यहाँ पूजाआजा वा दर्शन गरेमा सम्पूर्ण मनोकामना पुरा हुने जनविश्वास छ । वडा दशैंको अष्टमीका दिन यहाँ बलि दिने गरिन्छ ।
५. शैलेश्वरी मन्दिर
डोटी जिल्लाको सिलगढीमा अवस्थित शैलेश्वरी मन्दिर पनि दशैंमा विशेष मेला लाग्ने गरेको छ । यसबाहेक प्रत्येक वर्ष जेठ र कार्तिक पूर्णिमाका दिन वर्षमा लक्षबहन महायज्ञ हुँदै आएको छ ।
६. दन्तकाली मन्दिर
दन्तकाली मन्दिर सुनसरी जिल्लाको धरान उपमहानगरपालिकास्थित विजयपुर डाँडाको मध्यभागमा अवस्थित छ ।
यहाँ दशैंको नौरथामा विशेष मेला लाग्ने गर्छ । यसबाहेक तीज र स्वस्थानी पूर्णिमाका अवसरमा पनि दन्तकालीमा मेला लाग्ने गर्दछ ।
यो पनि पढ्नुहोस्ः सुख, समृद्धिका लागि दशैंमा जानैपर्ने उपत्यकाका १२ शक्तिपीठहरू
७. पाथिभरा देवी
ताप्लेजुङ जिल्लामा रहेको एक प्रसिद्ध तीर्थस्थल पाथिभारमा दशैं लगायत अन्य चाडहरूमा विशेष मेला लाग्ने गर्दछ । साथै यहाँ वर्षभरि भक्तजनहरूको घुइँचो लाग्ने गर्दछ ।
८. कालिञ्चोक मन्दिर
दोलखा जिल्लामा अवस्थित कालिञ्चोक भगवती काभ्रेको पलाञ्चोक भगवती, काठमाडौंको शोभा भगवती र अन्य भगवती समेत ७ भगवती दिदी बहिनी हुन् भन्ने किम्वदन्ती छ । यहाँ वडा दशैं, चैते दशैंमा र जनैपूर्णिमा भक्तजनको भिड लाग्ने गर्दछ ।
९. बागेश्वरी
बाँकेको नेपालगञ्जमा अवस्थित चर्चित बागेश्वरी मन्दिरमा दशैंको नौं दिन नै विशेष पूजाआजा हुने गर्दछ । नवरात्रको अवसरमा बागेश्वरीमा आइ व्रतबन्ध विवाह जस्ता संस्कार गर्न मुहूर्त जुराइरहनु पर्दैन भन्ने विश्वास छ । त्यसैले पनि प्रतिपदाको दिनदेखि नै यहाँ विभिन्न संस्कार गर्न आउनेहरूको भीड लाग्छ । यहाँ नौ दिनसम्म मेला लाग्ने गर्छ ।
१०. चन्द्रघण्टा दुर्गा मन्दिर
कपिलवस्तुको तौलिहवास्थित चन्द्रघण्टा दुर्गा मन्दिरमा दशैंभर यहाँ भक्तजनहरूको ठुलो भिड लाग्ने गर्छ । यस मन्दिरमा आश्विन कृष्ण सप्तमीका दिन स्थानीयले धुमधामका साथ फूलपाती भित्र्याउने गर्छन् ।
११. जलमुखी देवी
जलमुखी देवीको मन्दिर धादिङको चैनपुरमा अवस्थित छ । यस मन्दिरमा मन्दिरमा दशैंमा बढाइँ दिने चलन छ । 
१२. बडी मालिकास्थान
कालिकोट जिल्लास्थित बडी मालिका मन्दिर मार्तडीबाट तीन दिनको पैदलयात्रापछि पुगिन्छ । बडादशैं तथा चैतेदशैंमा यहाँ विशेष मेला लाग्ने गर्छ । १२ हजार २ सय १९ फिटको उचाइमा रहेको यो मन्दिरमा अष्टमीका दिन बलि दिएर टीका लगाउन घरमै पुग्ने प्रचलन छ ।
१३. त्रिपुरा सुन्दरी
बैतडी जिल्लाको दशरथचन्द नगरपालिका र डोल्पा जिल्लामा त्रिपुरा सुन्दरीका एक एक मन्दिर छन् । त्रिपुरा सुन्दरी भगवतीमा दशैंको बेला निकै भिडभाड हुन्छ । पञ्च बलिका लागि प्रख्यात यी मन्दिरमा चैते दसैँ र बडादसैँमा भव्य मेला लाग्छ ।
१४. बागलुङ कालिका
बागलुङ जिल्लाको बागलुङ कालिका मन्दिरमा हरेक वर्ष चैते दशैं र बडा दशैंमा नियम पूजा (जसलाई सरकारी पूजा पनि भनिन्छ) हुदैँ आएको छ । दशैंको कालरात्रि र नवमीको दिन यहाँ राँगो, कुखुरा, सुँगुर र परेवाको बलि दिइन्छ ।
१५. खैरावाङदेवी
खैरावाङ मन्दिर सल्यान जिल्लाको सदरमुकामबाट २० किलोमिटरको दूरीमा अवस्थित छ । यहाँ घटस्थापनादेखि पूर्णिमासम्म ठूलो मेला लाग्छ ।
बसोबासमा लिस्टेड प्रपर्टि हेर्नका लागि यहाँ क्लिक गर्नुहोस् ।
