वर्षको अन्तिममा सुध्रियो घरजग्गा बजार, एक महिनामै ४ अर्ब ३९ करोड राजस्व संकलन

काठमाडौं । चालु आर्थिक वर्ष २०८१/८२ को चैत महिनामा घरजग्गा कारोबार केही वृद्धि भएको छ । भूमि व्यवस्थापन तथा अभिलेख विभागको तथ्याङ्कअनुसार चैतमा ४९ हजार ८ सय ३२ संख्यामा घरजग्गाको लिखत पारित भएको छ । जुन गत महिनाको तुलनामा करिब ३८ सयले बढि हो ।

फागुनमा देशभरबाट ४६ हजार ६९ लिखत पारित भएको थियो । त्यस्तै  गत वर्षको चैतमा भने ५० हजार २ सय ५२ घरजग्गाको लिखत पारित भएको थियो ।

कारोबारमा वृद्धि भएसँगै सरकारले फागुनमा घरजग्गाबाट ४ अर्ब ३९ करोड ४६ लाख ८६ हजार ८ सय ६७ रूपैयाँ संकलन गरेको छ । जबकि फागुनमा ४ अर्ब १२ करोड ३१ हजार ७४ रूपैयाँ संकलन गरेको थियो । 

गत आर्थिक वर्षको चैतमा संकलित राजस्व ३ अर्ब ९४ करोड ८१ लाख ३६ हजार ८ सय १६ रूपैयाँ थियो । 

उपत्यका भित्रको घरजग्गा कारोबारः

उपत्यकामा लगनखेल, भक्तपुर, गोटिखेल, कलंकी, चाबहिल, डिल्लीबजार, मनमैजु, टोखा र साँखु गरी ९ वटा मालपोत कार्यालय छन् । जसमध्ये सबैभन्दा बढी कारोबार भक्तपुर मालपोत कार्यालयबाट भएको छ । 

भक्तपुरबाट १ हजार ६१ संख्यामा लिखत पारित भएको छ भने सबैभन्दा कम गोटिखेल मालपोत कार्यलयबाट १७ संख्यामा घरजग्गा लिखत पारित भएको छ ।

त्यसैगरी, लगनखेलबाट ९ सय ५१, कलंकीबाट ७ सय २७ को संख्यामा वटा घरजग्गा लिखत पारित भएको छ ।

उपत्यका बाहिरको घरजग्गा कारोबारः

उपत्यका बाहिर १ सय २५ वटा मालपोत कार्यालयहरू छन् । जसमध्ये सबैभन्दा धेरै कारोबार भूमिसुधार तथा मालपोत कार्यालय इनरुवा, सुनसरीबाट भएको छ । सुनसरीबाट १८ सय ९६ संख्यामा लिखत पारित भएको छ भने मालपोत कार्यालय सिंजा, नराकोट, जुम्लाबाट २ वटा लिखत पारित भएको छ ।

राजस्व संकलनको अवस्थाः

राजस्व संकलनमा भने काठमाडौं उपत्यका भित्रका मालपोत कार्यालय अग्रस्थानमा छन् । फागुनमा लगनखेल मालपोतबाट सबैभन्दा धेरै ३७ करोड ८९ लाख १७ हजार ५ सय ४० रुपैयाँ राजश्व संकलन गरेको विभागको तथ्यांक छ ।

यस्तै, कलंकीबाट ३३ करोड ४५ लाख ४४ हजार ८ सय ३४; डिल्लिबजारबाट ३१ करोड ५६ लाख ६७ हजार ८ सय २७;  चाबहिलबाट २९ करोड ८९ लाख ५८ हजार ८ सय ५१  र भक्तपुरबाट २७ करोड २५ लाख ७९ हजार ५ सय ३४ रुपैयाँ राजस्व संकलन भएको छ ।

स्रोतः भूमि व्यवस्थापन तथा अभिलेख विभाग

बसोबासमा लिस्टेड प्रपर्टि हेर्नका लागि यहाँ क्लिक गर्नुहोस् ।