असारमा घरजग्गा किनबेचको संख्या घटेपनि राजस्व संकलन ६ अर्ब नाघ्यो 

काठमाडौं । चालु आर्थिक वर्ष २०८१/८२ को असार महिनामा घरजग्गा कारोबार केही गिरावट देखिएको छ । भूमि व्यवस्थापन तथा अभिलेख विभागको तथ्याङ्कअनुसार असारमा ५५ हजार ५ सय २४ संख्यामा घरजग्गाको लिखत पारित भएको छ । जसबाट  ६ अर्ब ५५ करोड १७ लाख १२ हजार ८ सय ८४ रूपैयाँ संकलन भएको छ । 

उपत्यका भित्रको घरजग्गा कारोबार

उपत्यकामा लगनखेल, भक्तपुर, गोटिखेल, कलंकी, चाबहिल, डिल्लीबजार, मनमैजु, टोखा र साँखु गरी ९ वटा मालपोत कार्यालय छन् । जसमध्ये सबैभन्दा बढी कारोबार भक्तपुर मालपोत कार्यालयबाट भएको छ । 

भक्तपुरबाट १५ सय ७२ संख्यामा लिखत पारित भएको छ भने सबैभन्दा कम गोटिखेल मालपोत कार्यलयबाट १५ संख्यामा घरजग्गा लिखत पारित भएको छ ।

त्यसैगरी, लगनखेलबाट १ हजार ८०, कलंकीबाट ९ सय ६२ को संख्यामा घरजग्गा लिखत पारित भएको छ ।

उपत्यका बाहिरको घरजग्गा कारोबार

उपत्यका बाहिर १ सय २५ वटा मालपोत कार्यालयहरू छन् । जसमध्ये सबैभन्दा धेरै कारोबार भूमिसुधार तथा मालपोत कार्यालय इनरुवा, सुनसरीबाट भएको छ । सुनसरीबाट २ हजार ४ सय ३० संख्यामा लिखत पारित भएको छ भने मालपोत कार्यालय मनाङबाट ८ वटा लिखत पारित भएको छ ।

राजस्व संकलनको अवस्थाः

राजस्व संकलनमा भने काठमाडौं उपत्यका भित्रका मालपोत कार्यालय अग्रस्थानमा छन् । असारमा लगनखेल मालपोतले सबैभन्दा धेरै ६४ करोड ३१ लाख २ हजार ९ सय ३४ रुपैयाँ राजश्व संकलन गरेको विभागको तथ्यांक छ ।

यस्तै, भक्तपुरबाट ५२ करोड ९४ लाख ४० हजार ८ सय ९०; डिल्लिबजारबाट ५१ करोड ९७ लाख ८१ हजार १०; कलंकीबाट ४६ करोड ३७ लाख २४ हजार ६ सय ६२ र चाबहिलबाट ४२ करोड ५२ लाख ९१ हजार ५६ रुपैयाँ राजस्व संकलन भएको छ ।

स्रोतः भूमि व्यवस्थापन तथा अभिलेख विभाग

बसोबासमा लिस्टेड प्रपर्टि हेर्नका लागि यहाँ क्लिक गर्नुहोस् ।