६ महिनामा १ अर्ब ७६ करोडको सिमेन्ट र क्लिंकर निर्यात
काठमाडौं । नेपालबाट चालु आर्थिक वर्ष २०८०/८१ को ६ महिना मा १ अर्ब ७६ करोड रूपैयाँको सिमेन्ट र क्लिंकर निर्यात भएको छ । साउनदेखि पुस मसान्त सम्ममा ८७ करोड २० लाख रूपैयाँको सिमेन्ट र ८९ करोड १२ लाख रूपैयाँको क्लिंकर निर्यात भएको छ, जुन गत वर्षको तुलनामा २० गुणाले बढी हो ।
गत साउनदेखि पुससम्ममा नेपालबाट ८ करोड ७२ लाख रूपैयाँको सिमेन्ट र क्लिंकर निर्यात भएको थियो ।
हाल नेपालले भारतीय बजारमा अर्घाखाँची, पाल्पा, सीजी, बालाजी र सर्वोतम गरी ७ वटा ब्रान्डका सिमेन्ट बिक्री गरिरहेको छ । निर्यात हुन थालेको १८ महिनामा दुई अर्ब ५३ करोड रुपैयाँभन्दा बढीको सिमेन्ट भारतीय बजारमा बिक्री भएको छ ।
यति छोटो समयमा सिमेन्टको निर्यात वृद्धिदर उल्लेखनीय रूपमा बढेको छ । सरकारले स्वदेशी वस्तु निर्यातलाई प्रोत्साहन गरेपछि भारतीय सीमावर्ती क्षेत्रमा सिमेन्ट-क्लिंकर निर्यात बढ्न थालेको हो ।
यस अवधिमा मुलुकको समग्र निर्यात ७ प्रतिशतले घटेको छ । तर सिमेन्ट र आइरन स्टिलको निर्यातकै कारण समग्र निर्यात धेरै नखस्किएको भन्सार विभागले जनाएको छ । मुलुकबाट हुने समग्र निर्यातमा सिमेन्ट र क्लिंकरको योगदान २.३४ प्रतिशत छ ।
चालु आर्थिक वर्षको सिमेन्ट निर्यातको अवस्थाः
| क्र.सं | चालु आ.व. को महिना | कारोबार (रुपैयाँमा ) |
| १. | साउन | २३ करोड ५० लाख |
| २. | भदौ | १८ करोड ३४ लाख |
| ३. | असोज | ४३ करोड ४५ लाख |
| ४. | कात्तिक | २७ करोड ७६ लाख |
| ५. | मंसिर | ३६ करोड १५ लाख |
| ६. | पुस | २७ करोड नौ लाख |
स्रोतः भन्सार विभाग
बसोबासमा लिस्टेड प्रपर्टि हेर्नका लागि यहाँ क्लिक गर्नुहोस् ।
Latest Posts
Fresh reads from Basobaas
