काठमाडौं । युनाइटेड बचत तथा ऋण सहकारीले १५ लाखको ऋण दिई करोडौं मूल्यको घर तथा जग्गा कब्जा गरेको पाइएको छ । एक पत्रकार सम्मेलनका बीच सहकारीले पूर्वी–रुकुम पुथाउत्तर गंगा गाउँपालिका १० स्थायी निवासी सुरेन्द्र पुनको ७ करोड मूल्य बराबरको घर तथा जग्गा कब्जा गरेको खुलासा भएको हो । 

पुनले एक दशकभन्दा लामो समय जापानमा श्रम गरेर काठमाडौंको बालाजुमा घर तथा जग्गा किनेका थिए । सो सम्पत्ति अदालत, मालपोत, वडा कार्यालय र वकिलहरूसँगको मिलेमतोमा सहकारीले घर लिलाम गरेको पीडित पुनको आरोप छ । 

आफू वैदेशिक रोजगारको क्रममा २०६१ सालमा सहोदर भाइ पञ्च पुनले दाजु सुरेन्द्रको नाममा रहेको घरजग्गा किर्ते हस्ताक्षर र ल्याप्चे गरी ऋण लिएको अदालतले समेत पुष्टि गरेको छ । घरलाई दृष्टिबन्दक राखेर भाइ पञ्च, निरञ्जन प्रसाद शर्मा र दिपेन्द्र उप्रेतीले ५/५ लाख बाँडेको जिल्ला अदालत काठमाडौंले पुष्टि गरिसकेको छ । 

२०६३ सालमा सुरेन्द्र जापानबाट फर्किएपछि आफ्नो घरजग्गा किर्ते जालसाजी गरी सहकारीमा राखेको थाहा पाएपछि सोधिखोजी गर्दा तत्काल ऋणको दोब्बर बढी ३२ लाख तिर्न बाँकी भनी घरमा पत्र पठाएको पीडितको भनाइ छ । 

आफूले ऋण नलिएको र भाइले किर्ते गरेको भन्दा सहकारीले नमानेपछि न्यायको लागि काठमाडौँ जिल्ला अदालतमा मुद्दा लडेका थिए । 

करिब ७ वर्षपछि अदालतमा ल्याप्चे तथा हस्ताक्षर किर्ते पुष्टि भई पीडितको पक्षमा फैसला सुनाइएको थियो । तर पुनः सहकारीले त्यसविरुद्ध उच्च अदालत गई मिलेमतोमा मुद्दा उल्ट्याएको पीडितको आरोप छ । सो विरुद्ध पीडितले सर्वोच्च अदालतमा मुद्दा दायर गरेका थिए । तर सर्वोच्चले किर्ते तथा ठगी कुनै नभएको भन्दै लेनदेन मार्फत मिलापत्र गर्न पुनः जिल्ला अदालत फर्काएको पीडितको भनाइ छ । 

१८ वर्षदेखि अदालतमा मुद्दा चलिरहँदा गत भदौमा सहकारीले कानुनी मर्यादालाई तोड्दै घरजग्गा लिलाम गरी आफूलाई सडकमा पुर्‍याएको पीडितको भनाइ छ ।

बसोबासमा लिस्टेड प्रपर्टि हेर्नका लागि यहाँ क्लिक गर्नुहोस् ।