काठमाडौं । सरकारले नयाँ संसद भवनको साजसज्जामा २ अर्ब ३४ करोड खर्च गर्ने भएको छ । करिब ७ अर्ब लगानीमा बन्ने संसद भवनमा इन्टेरियरसहित कन्फ्रेन्स र सेक्युरिटी सिस्टमको ठेक्का केसी/श्याम सुन्दर/बानियाँ जेभीले पाएका छन् ।
ठेक्का अन्तरगत संसद भवनभित्रको सजावट टेबल, कुर्सी, सोफासहितका फर्निचर तथा अडियो/भिडियो र सेक्युरिटी सिस्टम जडानको काम हुनेछ ।
इन्टेरियरको काम सम्पन्न गर्न करिब एक वर्ष र अन्य सिस्टम जडानका लागि करिब ६ महिना समय लाग्ने अनुमान छ । हालसम्म संसद भवन निर्माणको काम ६० प्रतिशत मात्रै सकिएको छ ।
नयाँ संसदको भवन बनाउन १६ असोज २०७६ मा टुन्डी शेक जेभीसँग ६ अर्ब ९२ करोड रुपैयाँमा ठेक्का सम्झौता भएको थियो ।
सुरुको ठेक्का सम्झौताअनुसार १५ असोज २०७९ मा संसद भवन तयार भइसक्नुपर्ने थियो । तर पटकपटक म्याद थप गर्दा पनि निर्माण सम्पन्न हुन सकेको छैन । थपिएको म्याद असारसम्म रहेको छ ।
१ सय ७३ रोपनी ८ आनामा निर्माणाधिन संघीय संसदमा ७०० सिट क्षमताको प्रतिनिधिसभा बैठक हल बन्दैछ । जहाँ ४०० सिट क्षमताको सभाहल र ३०० सिट क्षमताको बालकोनी हुनेछ ।
यस्तै राष्ट्रियसभा हलमा ९० र बालकोनीमा २०० गरी २९० सिट क्षमताको हल तयार हुनेछ ।
३५० सिट क्षमताको संयुक्त लबि र साना ठूला गरी १० राजनीतिक दलका लागि कार्यालय र बैठक कक्ष बनाइँदैछ ।
प्रधानमन्त्री, सभामुख, राष्ट्रियसभा अध्यक्ष, दलका प्रमुख सचेतक लगायतलाई अति विशिष्ट कक्ष तयार गरिंदैछ ।
हरेक कार्यकक्षमा २५ सिटको बैठक हल पनि हुनेछ । संघीय संसद परिसरमा पुस्तकालय र क्यान्टिन समेत तयार हुँदैछ । यी भवनसहित पूर्वाधारको साजसज्जाको काम नयाँ ठेक्कामार्फत गरिनेछ ।
हाल सरकारले बानेश्वरस्थित अन्तर्राष्ट्रिय सम्मेलन केन्द्रलाई भाडामा लिएर संसदको पूर्णसदनका काम कारबाही सञ्चालन गरिरहेको छ ।
बसोबासमा लिस्टेड अन्य प्रपर्टि हेर्नका लागि यहाँ क्लिक गर्नुहोस् ।
