पोखराको २८ रोपनी जग्गा बेच्दै महावीर पुन
काठमाडौं । कृषि औजार कारखाना चलाउन महावीर पुनले जग्गा बिक्री गर्ने भएका छन् । राष्ट्रिय आविष्कार केन्द्रलाई ठुलो रकम आवश्यक परेको भन्दै पुनले केन्द्रलाई ६ वर्ष अगाडि आफैले दान दिएको जग्गा बिक्री गर्ने घोषणा गरेका हुन् ।
गत शनिबार फेसबुक स्ट्याटस मार्फत पुनले पोखराको बेगनास ताल नजिकै ठूलाकोट डाँडामा रहेको २८ रोपनी जग्गा बिक्री घोषणा गरेका हुन् । उनले २०७३ साल साउनमा फेसबुकमा स्ट्याटस लेखेर सो जग्गा केन्द्रलाई दान दिएको घोषणा गरेका थिए ।
उनको फेसबुक स्ट्याटसमा भनिएको छ, ‘पोखरा नजिकै को २८ रोपनी जग्गा बिक्रीमा छ ! ईच्छा र पैसा हुनेले किन्नु होस् !! यो जग्गा बेचेर आएको पैसा बीरगंजको कृषि औजार कारखानामा र यो बर्ष गण्डकी प्रदेशमा गर्ने भनिएको कामहरुमा प्रयोग हुनेछ । जसरी भए पनि नबेची नछाड्ने हो ।
यदि तपाइँहरुले डांडाको टुप्पोमा होटेल रिसोर्ट खोल्न वा आश्रम बनाउन वा ध्यान केन्द्र बनाउन वा मनोरंजन पार्क बनाउन वा शान्त ठाउँमा प्राइभेट घर बनाएर जीन्दगी बिताउनको लागी जग्गा खोज्नु भएको छ भने तल फोटोमा देखाइएको 28 रोपनी जग्गा बिक्रीमा छ । यो जग्गा मेरो नाममा छ तर पाँच बर्ष अगाडी नै मैले राष्ट्रिय आविष्कार केन्द्रलाई दिएको हो । यसको पैसा आविष्कार केन्द्रलाई जान्छ । जग्गाको मुल्य त्यो क्षेत्रमा चलेको दर भाउ हुनेछ । मैले सुने अनुसार त्यो क्षत्रमा मोटामोटी एक रोपनीको ३० देखि ५० लाख रुपैंया जति छ रे । त्यो जग्गा बाट पोखराको अन्तराष्ट्रिय विमानस्थल, बेगनास ताल, हिमाल, फेवाताल देखिन्छ । यो जग्गा भएको ठाउँको नाम ठुलाकोट हो । जग्गा सम्म पीच बाटो गएको छ र बिजुली छ ।
नोट: जति सक्दो छिटो यो जग्गा बेच्नु पर्छ । कुरा एकदमै गम्भीर छ । कसैले पनि होच्याएर र हावा कुरा गरेर खिल्ली नउड़ाउनु होला र ख्याल ठट्टा नगर्नु होला । साँच्चि कै किन्ने ले मात्र मलाई फोन गर्नु होला ।’
राष्ट्रिय आविष्कार केन्द्रका लागि रकम जुटाइरहेका समाजसेवी महावीर पुनले आफ्नो निजी जग्गा दान गर्ने घोषणा ६ वर्ष अघि नै गरेका थिए । पर्वत बन्बरेका पदम राईसँग मिलेर २० वर्षअघि किनेको सो जग्गाको मूल्य त्यति बेला तीन करोड रुपैयाँ रहेको उनको भनाई थियो । अहिले त्यसको मूल्य १४ करोडको हाराहारीमा हुने देखिएको छ ।
जग्गा किन्ने बेलामा नै पुनले भविष्यमा समुदायहरूलाई फाइदा हुने कामको लागि प्रयोग गर्ने भनेर किनेको बताएका थिए । सोहीअनुसार दान गरेको महावीरले त्यही बेला बताएका थिए ।
पैसाको आवश्यक परेमा सो जग्गा बिक्री गर्ने वा त्यहाँ अनुसन्धानको लागि भौतिक संरचना बनाइने पुनको ६ वर्ष अघिको घोषणा अनुसार अहिले जग्गा बिक्रीमा राखिएको छ । कतिपयले त्यो नबेच्न समेत उनलाई फेसबुक मार्फत नै सल्लाह दिएका छन् । आफ्नो नाममा भौतिक सम्पत्तिका रूपमा रहेको सबै जग्गा उनले दान गर्दै देश विकासको लागि आफ्नो बाँकी सम्पूर्ण जीवन लगाउने यसअघि नै घोषणा गरिसकेका छन् ।
Latest Posts
Fresh reads from Basobaas
