काठमाडौं । प्रसिद्ध व्यापारिक समूह रमेश कर्पले नेपालकै ठूलो टाइल्स उद्योग खोल्ने भएको छ । विश्वको सातौँ ठूलो टाइल्स कम्पनी कजारिया सेरामिक्स लिमिटेडसँग कम्पनी स्थापना गर्ने सम्बन्धमा सम्झौता भएको कर्पले जनाएको छ ।
नेपालमा हालसम्मकै सबैभन्दा ठूलो टाइल्स उत्पादन कम्पनी स्थापना गर्ने कम्पनीको सम्झौतापत्रमा उल्लेख छ । जसको वार्षिक उत्पादन क्षमता ८ लाख वर्गमिटर हुनेछ ।
रमेश कर्पका कार्यकारी निर्देशक प्रतीक जलान र कजारिया सेरामिक्स लिमिटेडका अध्यक्ष÷प्रबन्ध निर्देशक अशोक कजारियाले सम्झौतापत्रमा हस्ताक्षर गरे । कम्पनी स्थापनाका लागि नेपाली ४ अर्ब लगानी हुनेछ । यसअनुसार दुवै कम्पनीको लगानी ५०/५० प्रतिशत हुनेछ ।
सेरामिक र भिट्रिफाइड टाईल्स उत्पादन गर्ने नवनिर्मित कारखानाको उत्पादन क्षमता ८ लाख वर्ग मिटर हुनेछ र सन् २०२३ को अन्त्यसम्ममा सञ्चालनमा आउने अपेक्षा गरिएको छ । नवनिर्मित कारखाना भविष्यमा आफू निर्यातका लागि तयार हुने र नेपाली बजारको मागलाई पूरा गर्ने परिकल्पनाका साथ स्थापना हुँदैछ । यसबाहेक, नेपालमा उपलब्ध प्रमुख कच्चा पदार्थहरू टायल्स उत्पादनमा प्रयोग गरिनेछ ।
नयाँ योजनाको बारेमा कजारिया सेरामिक्स लिमिटेडका संयुक्त प्रबन्ध निर्देशक अशोक कजारियाले नेपाल सधैँ महत्वपूर्ण बजार भएको बताए । उनले भने, ‘हामी यहाँ दुई दशकभन्दा बढी समयदेखि छौँ र यो कदमले नेपालको बजारमा हाम्रो उपस्थितिलाई अझ बलियो बनाउनेछ । यो परियोजना तत्काल शुरु गरी आउँदो २०२३ को अन्त्य सम्ममा सञ्चालनमा आउनेछ । हामी हाम्रा विश्वस्तरीय उत्पादनहरू नेपालमै प्रतिस्पर्धात्मक रुपमा उपलब्ध गराउन चाहन्छौँ ।’
उनले सुविधासम्पन्न प्लान्ट एक प्रतिष्ठित नमूना उद्योग बन्ने दाबी गरे । यसमा अत्याधुनिक प्रविधिको प्रयोग, गुणस्तर, दक्षता र वातावरणीय मापदण्डलाई प्राथमिकताका साथ प्रयोजन गरिने उनको भनाइ छ । रमेश कर्पका कार्यकारी निर्देशक जलानले पनि यो एक ऐतिहासिक परियोजना भएकाले यसले देशमा रोजगारी सृजना गर्न महत्वपूर्ण टेवा पुर्याउने बताए । उनी भन्छन्, ‘यो उद्योगबाट उत्पादित विश्वस्तरीय टाईल्स र अन्य उत्पादनहरू देशमै प्रतिस्पर्धात्मक मूल्यमा उपलब्ध हुनेछ ।’
नेपाललाई औद्योगिकीकरण गर्ने नेपाल सरकारको लक्ष्यलाई साकार बनाउन रमेश कर्प प्रतिबद्ध रहको रमेश कर्पका उपाध्यक्ष रोहित गुप्ताले बताए । आयोजना सुरुवातसँगै देशको अर्थतन्त्र बढ्नुका साथै मुलुकमा ठूलो लगानीको वातावरण सृजना हुने र निकट भविष्यमा नेपालमा यस्तै अन्य ठूला लगानीहरू भित्रिने कुरामा विश्वस्त भएको उनले जनाए ।’
कजारिया सेरामिक्स भारतमा सिरेमिक/भिट्रिफाइड टाईल्स को सबैभन्दा ठूलो र विश्वको सातौं ठूलो उद्योग हो । यसको भारतमा ८ (आठ) उत्पादन कम्पनी छन् जुन उत्तर प्रदेशको सिकन्दराबाद, राजस्थानको गैलपुर र मालुटाना, आन्ध्र प्रदेशको विजयवाडा र श्रीकालहस्ती, तेलंगानाको बालानगर र गुजरातमा तीनवटा छन् । उत्पादनको वार्षिक क्षमता ८४ मिलियन वर्ग मिटर रहेको छ ।
३४ वर्ष पहिले स्थापना भएको कजारिया कडा परिश्रम, नवोत्पादन र ग्राहकको विश्वासले अघि बढेको छ । कजारियाले सिरेमिक वाल र फ्लोर टाइल्सहरूका ३००० भन्दा बढी डिजाइन र प्रकार उत्पादन गर्दै आइरहेको छ । साथै भिट्रिफाइड टाईल्स , डिजाइनर टाईल्स र अरु थुप्रै उत्पादन बजारमा ल्याएको छ ।
यता ५० वर्षभन्दा अघि स्थापना भएको रमेश कर्पले स्थापना काल देखि नै आयात निर्यात, सञ्चार प्रविधि, वित्तीय सेवा, रियल स्टेट, जलविद्युत, खानी आदिमा प्रत्यक्ष संलग्न भई आइरहेको छ ।
