काठमाडौ । आगामी शुक्रबार देखि ललितपुरको ग्वार्कोमा फ्लाइ ओभर निर्माण सुरु हुने भएको छ । ४५५ मिटर लामो फ्लाइओभर निर्माणको ठेक्का पाएको आरसी, समानान्तर र रेलिग्रे जेभिले आगामी शुक्रबार बिहान ६ बजेबाट फिल्डमा काम सुरु गर्ने जनाएको हो ।
उक्त फ्लाइओभर इन्जिनियरिङ प्रोक्युरमेन्ट कन्स्ट्रक्सन (ईपीसी) मोडलमा निर्माण गर्न लागिएको कम्पनीले जनाएको छ ।
सुरुमा त्यहाँ ब्यारेकेडहरू राखेर काम सुरु गरिने र जमिन खन्ने लगायतका काम गर्न भने अझै समय लाग्ने सडक विभागले जनाएको छ । चक्रपथको चार लेनमा बालकुमारीतर्फबाट २८० र सातदोबाटोतर्फबाट १७५ मिटरको र्याम्प बनाउनुपर्नेछ । भने फ्लाइओभर ३५ मिटर हुनेछ ।
चक्रपथका चार लेनमा समानान्तर भएर बन्ने फ्लाइओभरले ग्वार्को चोकमा हुने जाम घटाउने विभागको विश्वास छ ।
फ्लाइओभर निर्माण भएपछि इमाडोल-पाटन गुड्ने सवारीसाधन फ्लाइओभरकै मुनि हालकै चक्रपथबाट वारपार गर्नेछन् ।
ठेक्का सम्झौता अनुसार कम्पनीले ४ महिनामा डिजाइनको काम सम्पन्न गर्नुपर्ने हुन्छ । त्यसैगरी २० महिनामा निर्माण गरी २ वर्षमा सबै काम सम्पन्न गरिसक्नुपर्ने छ ।
जेभिले १७ करोड ६८ लाख ८८ हजार ८०८ रुपैयाँ लागतमा निर्माण सम्पन्न गर्नेगरी फ्लाइओभर निर्माणको जिम्मा लिएको हो । फ्लाइओभर बनाउन अर्थ मन्त्रालयले ३३ करोडको स्रोत सुनिश्चित गरेकोमा कम्पनीले अनुमानित लागतभन्दा करिब ३८ प्रतिशत कम मूल्यमा ठेक्का हात पारेको थियो ।
ट्राफिक व्यवस्थापन प्रभावितः
अत्यधिक ट्राफिक जाम हुने क्षेत्रमा बन्न लागेको यस फ्लाइओभरले सवारीसाधनको चापबाट हुने समस्यामा राहत पुग्ने अपेक्षा गरिएको भएपनि हालका लागि सो क्षेत्रको ट्राफिक व्यवस्थापन प्रभावित भएको छ ।
आइतबार एक सूचना जारी गर्दै काठमाडौँ उपत्यका ट्राफिक प्रहरी कार्यालयले मंसिर २३ गतेदेखि काम सम्पन्न नहुन्जेलसम्मका लागि सवारी लेन तोकेको छ ।
बल्खुबाट सातदोबाटो हुँदै कोटेश्वरतर्फ आवतजावत गर्ने यात्रुबाहक, मालबाहक तथा दुई पाङ्ग्रे सवारी साधनलाई बल्खुबाट सर्भिस लेनमा र साना चारपाङ्ग्रे सवारी साधनलाई फास्ट ट्रयाकबाट सञ्चालन गरिने प्रहरी कार्यालयले जनाएको छ ।
त्यस्तै, कोटेश्वरबाट सातदोबाटोतर्फ आवतजावत गर्ने सबै सवारी साधनलाई ग्वार्को चोकभन्दा ६ सय मिटर अगाडि र पछाडि सर्भिस लेन हुँदै चलाउने तयारी छ ।
