काठमाडौं । फेसबुकमा ‘घरजग्गा लोन सेवा’ नामक पेज बनाई ठगी गरेको आरोपमा प्रहरीले एक जना युवकलाई पक्राउ गरेको छ । पक्राउ पर्नेमा सिन्धुपाल्चोक जिल्ला मेलम्ची घर भई हाल काठमाडौंको बसुन्धरामा बस्दै आएका २७ वर्षीय रामचन्द्र चालिसे रहेको प्रहरीले जनाएको छ ।
ठगी गरेको पैसाले उनी काठमाडौंका महँगा होटलहरूमा बस्ने गरेको तथ्य खुलेको छ ।
वास्तविक नाम रामचन्द्र भए पनि उनले आफूलाई नकुल चालिसे, आकाश भट्टराई र आर.एन क्षेत्री भनेर ग्राहकलाई चिनाउने गरेको अनुसन्धानबाट खुलेको छ ।
चालिसेले उत्तमकुमार, राजकुमार तामाङ, सोनुबाबु लामा, विष्णु क्षेत्री तथा गणेशबहादुर खड्का लगायतका व्यक्तिहरूबाट घरजग्गा लोन मिलाइदिन्छु भनेर ५७ लाख २० हजार लिएका थिए ।
साथै उनले कतिपय व्यक्तिहरूका नाममा कम्पनी खोल्ने भनेर नागरिकता दुरुपयोग गरेको पनि पाइएको छ । कतिपय ग्राहकको नागरिकता लिएर विभिन्न बैंकमा खाता खोलेको अनुसन्धानबाट खुलेको छ ।
प्रहरीले चालिसेविरूद्ध ठगी र बैंकिङ कसुर गरेको अभियोगमा थप अनुसन्धान भइरहेको जनाइएको छ ।
यस पेजबाट सम्पर्क भई ठगीमा परेको भए जिल्ला प्रहरी परिसर टेकुमा सम्पर्क गर्न आग्रह गरिएको छ । साथै अनलाइनबाट कारोबार गर्दा कम्पनी दर्ता भए नभएको बुझेर मात्र कारोबार गर्न आग्रह गरिएको छ ।
बसोबासमा लिस्टेड अन्य प्रपर्टि हेर्नका लागि यहाँ क्लिक गर्नुहोस् ।
