९ महिनामा ४२ करोडको सिमेन्ट तथा क्लिङ्कर निर्यात

काठमाडौं । चालु आर्थिक वर्षको ९ महिनामा नेपालबाट ४२ करोड रुपैयाँ बराबरको सिमेन्ट तथा क्लिङ्कर निर्यात भएको छ । नेपालले साउनदेखि चैत मसान्तसम्म २३ करोड रुपैयाँ बराबरको क्लिङ्कर र १८ करोड रुपैयाँ बराबरको सिमेन्ट निर्यात गरेको हो । 

चैतमा मात्र १२ करोड बराबरको सिमेन्ट तथा क्लिङ्कर निर्यात भएको भन्सार विभागको तथ्यांकले देखाएको छ ।

चालु आर्थिक वर्षको चैतसम्म सिमेन्ट तथा क्लिंकर निर्यातको अवस्थाः

स्रोतः भन्सार विभाग

सरकारले चालु आर्थिक वर्षको बजेटमार्फत सिमेन्ट, स्टिललगायत सामान निर्यातमा आठ प्रतिशत अनुदान र वार्षिक दश करोड बढिको विद्युत् खपत गर्ने उद्योगलाई दुईदेखि १५ प्रतिशतसम्म महसुलमा छुट दिने घोषणासँगै निर्यातको संख्यामा वृद्धि भएको छ । 

सो व्यवस्था गरेसँगै दुई नेपाली सिमेन्ट उद्योग पाल्पा र अर्घाखाँची सिमेन्टले ‘तानसेन’ ब्रान्ड र अर्घाखाँची ब्रान्डको सिमेन्ट भारत निर्यात सुरु गरेको थियो । 

हाल अर्घाखाँची सिमेन्ट भारतको उत्तर प्रदेशमा निर्यात भइरहेको छ । निर्यात र विद्युत् महसुलमा छुट पाउने भएपछि उद्योगी उत्साहित छन् । 

सिमेन्ट उत्पादक संघको तथ्यांकअनुसार नेपालमा ५० भन्दा धेरै सिमेन्ट उद्योग सञ्चालनमा छन् । तीमध्ये करिब १५ वटाले सिमेन्ट र क्लिङ्कर दुवै उत्पादन गर्दै आएका छन् । यी सिमेन्ट उद्योगको वार्षिक उत्पादन क्षमता झण्डै दुई करोड २० लाख टन छ ।