घरबाट केही दिनका लागि बाहिर जादैँ हुनुहुन्छ ? आउनुहोस् यस अवधिमा घर वरिपरी लगाइएका बोटबिरुवालाई कसरी जोगाउन सकिन्छ भन्ने कुराको छलफल गरौँ ।

भनिन्छ कहिलेकाही आफ्नो कामको र घरको चिन्ता छोडेर कतै घुम्न जानु स्वास्थ्यको लागि राम्रो हुन्छ र हाम्रो शरिरलाई अझै फुर्तिलो बनाउँछ तर हामी आफ्नो घर वरिपरी हरियाली बनाइ राख्न पनि चाहन्छौँ ।त्यसैले प्राय: सबैको घर वरिपरी करेसा बारी वा बगैँचा हुन्छ र धेरै ठाउँ नहुनेको घरमा पनि गमलामा रोपेको देख्न सकिन्छ तर लामो समयको लागि घर छोडेर जाँदा आफुले रोपेका बिरुवा मर्छन कि भन्ने कुराको चिन्ता भैरहन्छ । केही दिनको लागि साथीभाई , छिमेकी वा आफन्तलाई बोटबिरुवाको हेरबिचार गर्न अनुरोध गर्दा पनि हुन्छ तर सबैलाई वा सधैं यसरी सहयोग मागिरहन सहज नहुन सक्छ । यद्यपी यसका लागि हामी आँफै केही उपायहरु आप्नाउन सक्छौँ र आफ्नो करेसा वा बगैँचालाई हरियो र रमणिय बनाउन सक्छौँ ।

त्यसैले कतै टाढा जाँदा यसको लागि उचित व्यवस्थापन गरेर मात्र जानु पर्छ । बोटबिरुवालाई लामो समय सम्म जोगाउन तल केही उपायहरुको बारेमा चर्चा गरौँ  ।

१: गोडमेल

घर छोडेर जानु अगाडि आफ्नो करेसा बारी, बगैँचा वा गमलाका बोटबिरुवालाई राम्रोसँग गोडमेल गर्नु पर्छ जसको फल स्वरुप बोट वरिपरी अनावश्यक झारपात आएर बोटमा क्षती गर्न पाउदैन र बोट राम्रोसँग सप्रन्छ ।

२: मल हाल्ने

घरबाट हिंड्नु भन्दा अगाडि सबै बोट बिरुवामा आफुलाई उपलब्ध हुने मल हाल्नु पर्छ । घरमा सुखा खालको कम्पोस्ट मल बनाएर हाल्दा बोट बिरुवा राम्रोसँग हुर्किन्छ । यसरी मल हालेर जाँदा बिरुवा मर्ने डर हुँदैन र हरियाली भैरहन्छ । यसै समयमा थाक्रा चाहिने खालका लहरे फल वा तरकारी जस्तै गोलभेडा, तितेकरेलामा थाक्राको व्यवस्था गर्न भुल्नु हुँदैन  ।

३: थोपा सिंचाइ

घरमा करेसा बारी छ भने थोपा सिंचाइ पानी हाल्न उचित तरिका हुन सक्छ । यो यस्तो सिंचाइ प्रकृया हो जसले पानीको बचत गर्छ र हरेक बोटको जरा सम्म पानी पुर्‍याउँछ । यसलाई जडान गर्न पाइप, फिटिस, सकेट, वाटर ट्यांक लगायतका सामानको आवश्यक पर्छ ।एक पटक जडान गरे पछि सधैंको लागि यसबाट सिंचाइ गर्न सकिन्छ । कतै टाढा जानु छ भने सानो धारो खोलेर छोड्दा केही फरक पर्दैन यसले थोरै मात्रामा पानीको उपभोग गर्छ ।

४: गमलामा लगाएका बोटलाई एकै ठाउँमा राखेर छिडकाव सिंचाइको प्रयोग गर्ने ।

 घरहरुमा गमला ठाउँ ठाउँमा राखेका हुन्छन । घर छोडेर जानु अगाडि सबै गमला एकै ठाउँमा जम्मा पार्नु पर्छ र छिडकाव सिंचाइको प्रयोग गर्नु पर्छ । यदि घरमा बगैँचा पनि छ भने सबै गमला बगैँचाको छेउमा राखेर सबै तिर फैलिने गरेर छिडकाव सिंचाइको प्रयोग गर्नु उचित हुन्छ जसले गर्दा बगैँचाको साथसाथै गमलाका बोटहरुमा पनि पानी पर्छ र बोट सुक्ने सम्भावना कम हुन्छ ।

५: खाली ठाउँमा केही तरकारी रोपेर छोडि दिने ।

करेसा वा बगैंचामा केही ठाउँ रहेको छ भने त्यस ठाउँमा तरकारी वा फुलहरुको बिउ छरेर छोड्न सकिन्छ जसको फल स्वरुप त्यहाँ धेरै झार पात उम्म्रिदैन र फर्केर आउँदा फुल वा तरकारीको बोट भएको पाउन सकिन्छ ।

६: फलेका तरकारीहरु टिपेर राख्ने ।

घरबाट निस्किनु अगाडि आफ्नो करेसा वा गमलामा फलेका तरकारी वा फललाई तिप्नु पर्छ । यसरी फल वा तरकारी टिप्दा कुहिएर खेर जादैँन ।

यसरी घर छोडेर केही दिन बाहिर जाँदा पनि हामी आफ्नो घर वरिपरिका बोटबिरुवालाई जोगाउन सकिन्छ । धेरै लामो समयसम्म बाहिर जाँदा आफ्नो साथीलाई समय मिलेसम्म करेसा वा बगैँचाको हेरबिचार गर्न अनुरोध गर्दा पनि हुन्छ र फलेका फल वा तरकारीहरु टिपेर लैजान आग्रह गर्नु पर्छ । तपाईंले घर छोडेर जाँदा कस्ता उपाय अप्नाउनु हुन्छ र माथिका उपायहरु कस्ता लागे। कृपया कमेन्ट गरेर आफ्नो राय वा सल्लाह सुझाब दिन नभुल्नु होला । यदि मन पर्‍यो भने सियर पनि गरिदिनु होला?

Write A Comment